| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 18.115 | Dem. 18.118 (English) | >>Dem. 18.120 |
18.117τούτων ἕκαστος , Αἰσχίνη , τῆς μὲν ἀρχῆς ἧς ἦρχεν ὑπεύθυνος ἦν , ἐφʼ οἷς δʼ ἐστεφανοῦτο οὐχ ὑπεύθυνος . οὐκοῦν οὐδʼ ἐγώ · ταὐτὰ γὰρ δίκαιʼ ἐστί μοι περὶ τῶν αὐτῶν τοῖς ἄλλοις δήπου . ἐπέδωκα · ἐπαινοῦμαι διὰ ταῦτα , οὐκ ὢν ὧν ἔδωχʼ ὑπεύθυνος . ἦρχον · καὶ δέδωκά γʼ εὐθύνας ἐκείνων , οὐχ ὧν ἐπέδωκα . νὴ Δίʼ , ἀλλʼ ἀδίκως ἦρξα . εἶτα παρών , ὅτε μʼ εἰσῆγον οἱ λογισταί , οὐ κατηγόρεις ;
ἵνα τοίνυν ἴδηθʼ ὅτι αὐτὸς οὗτός μοι μαρτυρεῖ ἐφʼ οἷς οὐχ ὑπεύθυνος ἦν ἐστεφανῶσθαι , λαβὼν ἀνάγνωθι τὸ ψήφισμʼ ὅλον τὸ γραφέν μοι . οἷς γὰρ οὐκ ἐγράψατο τοῦ προβουλεύματος , τούτοις ἃ διώκει συκοφαντῶν φανήσεται . λέγε .
18.118
Ψήφισμα
ἐπὶ ἄρχοντος Εὐθυκλέους ,πυανεψιῶνος ἐνάτῃ ἀπιόντος ,φυλῆς πρυτανευούσης Οἰνῇδος ,Κτησιφῶν Λεωσθένους Ἀναφλύστιος εἶπεν ·ἐπειδὴ Δημοσθένης Δημοσθένους Παιανιεὺς γενόμενος ἐπιμελητὴς τῆς τῶν τειχῶν ἐπισκευῆς καὶ προσαναλώσας εἰς τὰ ἔργα ἀπὸ τῆς ἰδίας οὐσίας τρία τάλαντα ἐπέδωκε ταῦτα τῷ δήμῳ ,καὶ ἐπὶ τοῦ θεωρικοῦ κατασταθεὶς ἐπέδωκε τοῖς ἐκ πασῶν τῶν φυλῶν θεωροῖς ἑκατὸν μνᾶς εἰς θυσίας ,δεδόχθαι τῇ βουλῇ καὶ τῷ δήμῳ τῷ Ἀθηναίων ἐπαινέσαι Δημοσθένην Δημοσθένους Παιανιέα ἀρετῆς ἕνεκα καὶ καλοκαγαθίας ἧς ἔχων διατελεῖ ἐν παντὶ καιρῷ εἰς τὸν δῆμον τὸν Ἀθηναίων ,καὶ στεφανῶσαι χρυσῷ στεφάνῳ ,καὶ ἀναγορεῦσαι τὸν στέφανον ἐν τῷ θεάτρῳ Διονυσίοις τραγῳδοῖς καινοῖς ·τῆς δὲ ἀναγορεύσεως ἐπιμεληθῆναι τὸν ἀγωνοθέτην .
| Demosthenes, Speeches (XML Header) [genre: prose; rhetoric] [word count] [lemma count] [Dem.]. | ||
| <<Dem. 18.115 | Dem. 18.118 (English) | >>Dem. 18.120 |
